جنوب کے اصحابِ کمال" جلد پنجم کی رسمِ رونمائیروایات سے بغاوت نہیں، بلکہ روایت میں مثبت تبدیلی وقت کی ضرورت ہے: ڈاکٹر راہی فدائی

جنوب کے اصحابِ کمال" جلد پنجم کی رسمِ رونمائیروایات سے بغاوت نہیں، بلکہ روایت میں مثبت تبدیلی وقت کی ضرورت ہے:   ڈاکٹر راہی فدائی

 

علم و ادب کی دنیا میں ایک یادگار شام اس وقت رقم ہوئی جب معروف عالمِ دین، ادیب، شاعر اور محقق ڈاکٹر راہی فدائی کی

 گراں قدر علمی و ادبی تصنیف "جنوب کے اصحابِ کمال" کی جلد پنجم" ثوابت" کی رسمِ رونمائی ہندوستانی اردو منچ کے هم سینٹر میں نہایت وقار اور تزک و احتشام کے ساتھ منعقد ہوئی۔ تقریب کی صدارت معروف ادبی شخصیت جناب ماہر منصور نے فرمائی، جبکہ علمی، ادبی اور سماجی حلقوں کی نمایاں شخصیات نے کثیر تعداد میں شرکت کر کے تقریب کو چار چاند لگائے۔

تقریب سے خطاب کرتے ہوئے ڈاکٹر راہی فدائی نے کہا کہ معاشرے کی حقیقی ترقی کے لیے محض روایات کا سہارا کافی نہیں، بلکہ وقت کے تقاضوں کے مطابق روایت میں مثبت اور تعمیری تبدیلی بھی ناگزیر ہے۔ انہوں نے واضح کیا کہ ان کا مقصد روایات سے بغاوت ہرگز نہیں، بلکہ ان میں زندگی کی روح پھونکنا ہے۔ انہوں نے مزید کہا کہ جنوبی ہند کی عظیم علمی، ادبی اور سماجی شخصیات کی خدمات کو آنے والی نسلوں کے لیے محفوظ کرنا وقت کی اہم ترین ضرورت ہے اور "جنوب کے اصحابِ کمال" اسی تاریخی مقصد کی ایک اہم کڑی ہے۔

تقریب کے مہمانِ خصوصی، رکنِ اردو اکادمی اور معروف کالم نگار جناب محمد اعظم شاہد نے کتاب پر مدلل اور تفصیلی تبصرہ پیش کیا اور کہا کہ ڈاکٹر راہی فدائی کی یہ تصنیف جنوبی ہند کی علمی و ادبی تاریخ کو محفوظ کرنے کی ایک سنجیدہ، بھرپور اور قابلِ ستائش کوشش ہے، جو آنے والے محققین کے لیے ایک معتبر حوالے کی حیثیت رکھتی ہے۔ جناب عبداللہ نادر عمری نے کتاب اور مصنف پر ایک پُراثر قلمی خاکہ پیش کیا جسے حاضرین نے بے حد سراہا۔

کتاب کا باقاعدہ اجرا پروفیسر سید سجّاد حسین، جناب اقبال احمد بیگ اور صدرِ محفل جناب ماہر منصور کے دستِ مبارک سے عمل میں آیا، جنہوں نے اس موقع پر کتاب اور مصنف کی علمی خدمات پر اپنے قیمتی خیالات کا اظہار بھی کیا۔ اس موقع پر ہندوستانی اردو منچ کے صدر جناب اعجاز علی جوہری نے خطاب کرتے ہوئے نوجوان نسل کو زبانِ اردو کی طرف راغب کرنے پر زور دیا اور کہا کہ اردو کا مستقبل ہماری نئی نسل کے ہاتھوں میں ہے۔ تقریب کے کنوینئر جناب جمیل احمد ملنسار نے آغازِ تقریب میں مہمانوں کا پُرتپاک استقبال کیا، جبکہ نظامتِ تقریب کے فرائض معروف صوفی شاعر جناب منیر احمد جامی نے خوش اسلوبی سے انجام دیے۔

رسمِ رونمائی کے اختتام پر ایک پُرکیف مشاعرے کا اہتمام کیا گیا جس میں جناب ماہر منصور، انور ترپتوری، غفران امجد، انور عزیز، سردار دانش، ڈاکٹر ارشد جمال اور منیر احمد جامی نے اپنا کلام سنا کر حاضرین سے خوب داد وصول کی اور محفل کو یادگار بنا دیا۔

جناب ین۔ ڈی ۔ملا، سیکریٹری ہندوستان اردو منچ کے شکریہ پر پروگرام کا اختتام ہوا۔